ဒီကနေ့ မနက်အစောပိုင်းမှာ ကစားသွားတဲ့ ပရီးမီးယားလိဂ် ပွဲစဉ်မှာတော့ ဖူလ်ဟမ်က တော့တင်ဟမ်ဟော့စပါးကို ပွဲအစ ၆ မိနစ် အတွင်း သွင်းယူခဲ့တဲ့ ဂိုးတွေနဲ့ အနိုင်ရသွားခဲ့ပါတယ်။ စပါးဟာ ပြိုင်ပွဲစုံ နောက်ဆုံး ၃ ပွဲဆက် ရှုံးနိမ့်ခဲ့တာ ဖြစ်ပြီး လက်ရှိ အသင်းရဲ့ အခြေအနေကြောင့် နည်းပြ သောမက်စ် ဖရန့်ခ်ရဲ့ ရာထူး ကလည်း စိုးရိမ်စရာ ရှိလာခဲ့ပြီ ဖြစ်ပါတယ်။
ဒီနေ့ပွဲမှာ စပါး ဘက် အဓိက နောက်ခံလူ ခရစ္စရှန် ရိုမီယို၊ ဘစ်ဆူးမား၊ ကူလူဆက်ဗ်စကီး၊ ဆိုလန်ကီ၊ ဂျိမ်းစ် မက်ဒီဆင် တို့ ပါဝင်နိုင်ခဲ့ခြင်း မရှိပါဘူး။ ဖူလ်ဟမ် ဘက်မှာတော့ ရော်ဘင်ဆင်နဲ့ ရိုဒရီဂို မူနစ်ဇ်တို့ လွဲချော်ခဲ့ပါတယ်။ ပြောရမယ် ဆိုရင် ဒီပွဲမှာ ဖူလ်ဟမ်က သူတို့ရဲ့ လန်ဒန် မြို့ခံပြိုင်ဘက် တော့တင်ဟမ်ဟော့စပါးကို အဝေးကွင်းမှာ ထိထိရောက်ရောက် ကစားနိုင်နိုင်ခဲ့ပြီး ဟယ်ရီ ဝီလ်ဆင်ရဲ့ အံ့မခန်း သွင်းဂိုးဟာ ကော့တေဂျာ တို့ အတွက် အရေးပါတဲ့ အနိုင်ဂိုး ဖြစ်စေခဲ့ပါတယ်။
အာဆင်နယ်နဲ့ ပဲရစ်စိန့်ဂျာမိန်း တို့ကို အကြီးအကျယ် ရှုံးနိမ့်ပြီးနောက် သောမတ်စ် ဖရန့်ခ်ရဲ့ အသင်းက ဖိအားတွေအောက်မှာ ရှိနေခဲ့ပြီး ၆ မိနစ် အတွင်းမှာ ပေးလိုက်ရတဲ့ သွင်းဂိုး ၂ ဂိုးက ပရိသတ်တွေရဲ့ ဒေါသကို ပေါက်ကွဲစေခဲ့ပါတယ်။ ဖူလ်ဟမ်ဟာ ပွဲချိန် ၄ မိနစ်မှာတင်ပဲ ဦးဆောင်ဂိုး ရခဲ့ပြီး တောင်ပံက ချူကွီဇီရဲ့ ပေးပို့မှုကို စပါး နောက်ခံလူတွေ တားဆီးပုံ ညံ့ခဲ့တာ ကနေ တီတီ က ကန်သွင်းရာမှာ အူဒိုဂီနဲ့ ထိကာ လမ်းကြောင်းပြောင်း ဂိုးဝင်သွားခဲ့တာ ဖြစ်ပါတယ်။ အဲဒီနောက် ၂ မိနစ် အကြာမှာ စပါး နောက်ခံလူတွေနဲ့ ဂိုးသမား ဗစ်ကာရီယိုရဲ့ အမှား ကနေ ဟယ်ရီ ဝီလ်ဆင်က ဂိုးသမား မရှိတဲ့ ဂိုးပေါက်ထဲကို အဝေးကန်ချက်နဲ့ လှလှပပ ကန်သွင်းသွားခဲ့လို့ စောစောစီးစီးပဲ ၀-၂ ဖြစ်သွားခဲ့ပါတယ်။ ချူကွီဇီရဲ့ နောက်တစ်ကြိမ် ကြိုးပမ်းမှု ကောင်းမွန်ခဲ့ပေမယ့် ဗန်ဒီဗန် အလျင်အမြန် ကာကွယ်နိုင်ခဲ့လို့သာ စပါးတို့ အခုထက် ပိုပြီး ဂိုးပြတ် မရှုံးခဲ့တာ ဖြစ်ပါတယ်။
စပါးက ဒုတိယပိုင်း မှာတော့ ကစားပုံ တိုးတက်လာခဲ့ပြီး ပြိုင်ဘက် ဂိုးပေါက်ကို အကြိမ်ကြိမ် ခြိမ်းခြောက်နိုင်ခဲ့ပေမယ့် ဂိုးပေါက် တည့်မှု ကတော့ ၂ ကြိမ်သာ ရှိခဲ့ပါတယ်။ စပါး အတွက် ချေပဂိုး ကိုတော့ မိုဟာမက် ကူဒု့စ်က ၅၉ မိနစ် အရောက်မှာ သွင်းယူပေးခဲ့ပေမယ့် လက်ကျန် မိနစ်တွေမှာ ဖူလ်ဟမ်က သတိထား ကစားသွားခဲ့လို့ ၁-၂ ရလဒ်နဲ့ပဲ ပွဲပြီးခဲ့ပါတယ်။
ပြီးခဲ့တံ့ ၆ ရက် အတွင်း အာဆင်နယ်နဲ့ ပါရစ်စိန့်ဂျာမိန်း တို့ကို ဆက်တိုက် ရှုံးနိမ့်ခဲ့ပြီး ၉ ဂိုး အထိ ပေးခဲ့ရတဲ့ စပါးဟာ အဆုံးသတ်ပိုင်း လိုအပ်ချက်တွေကြောင့် နောက်ထပ် ရှုံးပွဲ တစ်ပွဲနဲ့ ရင်ဆိုင်ခဲ့ရတာ ဖြစ်ပါတယ်။ ဒီရှုံးပွဲဟာ သူတို့ အတွက် ပရီးမီးယားလိဂ် အိမ်ကွင်း ပွဲစဉ် တစ်ပွဲမှာ ၂-၀ နဲ့ အစောဆုံး ရှုံးနိမ့်ခဲ့တဲ့ ပွဲစဉ်လည်း ဖြစ်ခဲ့ပါတယ်။ စပါးဟာ ခံစစ်ပိုင်း မှာသာ ရုန်းကန်ခဲ့ရတာ မဟုတ်ပါဘူး။ တိုက်စစ်ပိုင်း ကလည်း ပထမပိုင်းမှာ ဂိုးပေါက်တည့် ကန်ချက် တစ်ကြိမ်မှ မရှိခဲ့တဲ့ အထိ အခြေအနေ ဆိုးခဲ့တာပါ။ ဒုတိယပိုင်း မှာလည်း ဂိုးပေါက်တည့် ကန်ချက်က ၂ ကြိမ်သာ ရှိခဲ့တာ တွေ့ရပါတယ်။
စပါးဟာ ပရီးမီးယားလိဂ်မှာ နောက်ဆုံး ၄ ပွဲဆက် နိုင်ပွဲ ပျောက်နေခဲ့ပြီး ရှုံးပွဲ ၃ ပွဲ အထိ ရှိခဲ့တာကြောင့် လက်ရှိမှာ အမှတ်ပေးဇယား အလယ်ကို ရောက်ရှိသွားခဲ့ပါပြီ။ မာကို ဆေးလ်ဗားရဲ့ ဖူလ်ဟမ် ကတော့ တဖြည်းဖြည်း ခြေစွမ်း ပြန်လည် တည်ငြိမ်လာပြီး ပရီးမီးယားလိဂ် နောက်ဆုံး ၄ ပွဲမှာ နိုင်ပွဲ ၃ ပွဲအထိ ရှာဖွေထားနိုင်ပြီ ဖြစ်ပါတယ်။ ဒါကြောင့် ဖူလ်ဟမ်က ဒီနိုင်ပွဲနဲ့ အတူ အမှတ်ပေးဇယား အဆင့် ၁၅ နေရာကို ရောက်ရှိလာခဲ့ပြီး အဆင့် ၆ နေရာက အသင်းနဲ့ ၃ မှတ်သာ ကွာဟပါတော့တယ်။တော့တင်ဟမ်ဟော့စပါးဟာ လာမယ့် ပရီးမီးယားလိဂ် ပွဲစဉ် ၁၄ မှာ နယူးကာဆယ်ကို စိန့်ဂျိမ်းစ်ပါ့ခ်မှာ သွားရောက် ရင်ဆိုင်ရမှာ ဖြစ်လို့ ခက်ခဲဦးမှာပါ။ ဖူလ်ဟမ် ကတော့ သူတို့ရဲ့ ပုံစံကောင်း တစ်ခုကို ဆက်ထိန်းပြီး လာမယ့် ပွဲစဉ်မှာ မန်စီးတီးကို အိမ်ကွင်း ကရေဗင်ကော့တေ့ဂျ်မှာ ရင်ဆိုင်ရမှာ ဖြစ်ပါတယ်။
●●●
နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS
အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်
ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , တွစ်တာ , အင်စတာဂရမ် and ယူကျု့ဘ်.
